A’r Noson Santes Dwynwen casglodd tyrfa fawr yng Nghae Sgwâr Aberaeron i weld penllanw deuddeg diwrnod o weithgareddau sydd wedi bod yn destun siarad trwy’r dre! Fe osododd plant Dysgu Sylfaen yr ysgol her i’w hunain i ‘Loncian i Landdwyn’ ar y diwrnod arbennig hwn. Cyfanswm y milltiroedd oedd angen eu cyflawni oedd 113, sef y milltiroedd o Aberaeron i Ynys Llanddwyn. Tipyn o her! Erbyn 4.30yp roedd y lle yn llawn bwrlwm gyda’r cae wedi’i oleuo a miwsig yn atsain trwy’r dre! Gosodwyd trac ar ffurf calon yng nghanol y cae ac mi oedd yn olygfa arbennig i weld hyd yn oed plant y dosbarth meithrin yn ymdrechu’n galed i gwblhau’r her gyda chefnogaeth eu rhieni, teuluoedd a’u hathrawon. Dros y deuddeg diwrnod cyn hynny fe ryddhawyd fideos yn ddyddiol ar gyfryngau cymdeithasol yr ysgol ac ar dudalen Facebook ‘Straeon Aberaeron’ a oedd yn hyrwyddo’r digwyddiad yn defnyddio unigolion o’r gymuned. Gwelwyd amrywiaeth o unigolion o’r ficer i’r cynghorydd lleol a’r maer ynghyd â llawer o bobl fusnes y dref yn gwneud campau digon rhyfedd a ddenodd ddiddordeb anhygoel gan y cyhoedd. Mae’n werth chi gael golwg arnynt! Dyma beth oedd digwyddiad a unodd y gymuned gyfan gan godi arian at yr ysgol a chreu brwdfrydedd a hwyl yng nghanol mis Ionawr digon diflas. Diolch i Bwyllgor Gwelliannau Aberaeron am eu cymorth a’r Clwb Pêl-droed am fenthyg y llifoleuadau.

Ymunodd y rhan helaeth o flwyddyn 6 a ysgolion eraill Ceredigion i recordio cân wedi ei chyfansoddi gan Rhys Taylor a Lorraine King yn Neuadd Fawr, Canolfan y Celfyddydau. Y nôd yw bod 45,000 o blant ar draws Cymru yn canu’r gân a fydd yn cael eu ryddhau a’r gyfer Dydd Gwyl Dewi ynghyd a Cherddorfa Opera Cenedlaethol Cymru. Cyfle cyfforus i’r plant. Diolch yn fawr iawn i Wasanaeth Cerdd Ceredigion am gydweithio gyda ABC i wneud hyn yn bosib.